БОЗГАШТИ МУТАХАССИСОНИ ТОҶИК АЗ АМРИКО

  Душанбе, 5 октябр.(АМИТ «Ховар», Марзия Саидова).- 10 нафар муҳаққиқи бахши ҷамъиятшиносии Тоҷикистон аз Амрико баргаштанд. Онҳо муддати се ҳафта аз 9 то 30 сентябри соли 2010 дар Вашингтон бо усулҳои амалии нашри натиҷаҳои таҳқиқот таваҷҷӯҳи махсус зоҳир намуда, аз ҳамкасбони амрикоии худ роҳҳои самараноки таъсиррасонии марказҳои таҳқиқотии Амрико ба сиёсати давлатиро омӯхтанд. Инчунин, онҳо аз марказҳои илмию таҳқиқотии ҷамъиятӣ, хусусӣ ва давлатӣ боздид намуда, таъсири таҳқиқоти сиёсати давлатиро ба раванди сиёсатсозӣ аз бар карданд. Иштирокчиёни барнома тарзҳои ҳифзи манфиатҳои ҷомеа аз ҷониби марказҳои таҳқиқотию илмӣ ва таъсири маблағгузории хусусиро ба пешрафти таҳқиқот омӯхтанд.  Таҷрибаомӯзии мутахассисони тоҷик дар Амрико бо ташаббуси Оҷонсии Амрико оид ба рушди байналмилалӣ ва маблағгузории Сафорати Амрико дар Душанбе ҷараён гирифт. Сафари мутахассисони тоҷик ҷузъи барномаи табодули «Робитаи ҷомеаҳо» буда, он барои роҳбарони созмонҳои соҳибкорӣ ва касбии тамоми минтақаҳои Тоҷикистон имконияти таҷрибаомӯзӣ дар Амрикоро пешниҳод менамояд.