ИФТИТОҲИ БИНОИ НАВИ САФОРАТХОНАИ ТОҶИКИСТОН ДАР АФҒОНИСТОН

Душанбе, 26 октябр. (АМИТ «Ховар»).-Субҳи имрўз дар шаҳри Кобул бо иштироки Президенти Ҷумҳурии Тоҷикистон Эмомалӣ Раҳмон ва Президенти Ҷумҳурии Исломии Афғонистон Ҳомид Карзай бинои нави сафорати Тоҷикистон дар Афғонистон расман ифтитоҳ ёфт. Чунонки аён гашт, бинои нави Сафорати Тоҷикистон дар масоҳати беш аз 1 гектар замин дар яке аз манотиқи беҳтарини маркази шаҳри Кобул ҷойгир шудааст. Бино бо тарҳу намои замонавии худ ба ин мавзеи обрўманди шаҳри Кобул, ки минтақаи «Вазир Акбархон» номида мешавад, ҳусни тоза зам намудааст. Президенти Ҷумҳурии Тоҷикистон Эмомалӣ Раҳмон зимни суханронии худ, аз ҷумла изҳор дошт: — «натиҷаи кори кормандони ин сафорат бояд хеле беҳтар ва намоён аз пешина гардад, зеро шароити хуби кору зист барояшон ин ҷо муҳайё гаштааст». Президенти Ҷумҳурии Исломии Афғонистон Ҳомид Карзай бошад, бо ибораи устод Рўдакӣ изҳор дошт: «Аз ин бино ёди ёри меҳрубон ояд ҳаме, аз Тоҷикистони дўсту бародар». Сафорати Тоҷикистон аз бинои кории дуошёна, бинои истиқоматиии сеошёна бо 12 хонаи сеҳуҷрагӣ, бинои консулгарӣ ва бинои қабули меҳмонони расмӣ иборат аст. ҳамаи ин биноҳо бо тарҳи зебои замонавӣ, шароити хуби кору зиндагӣ ва ҳам фароғат бунёд ёфтаанд. Сарони ду давлати дўсту ҳамсоя – Эмомалӣ Раҳмон ва Ҳомид Карзай аз шароити хуби сафорат ва мавзеи ҷойгиршавии он, ки мутобиқ ба сатҳ ва мазмуни муносиботи дўстона ва ҳамкории судбахши ду кишвари ҳамсоя, ҳаммарз, ҳамзабон ва ҳамдил аст, изҳори қаноату хушнудӣ карданд. Ба гуфти чанде аз коршиносони афғон, Тоҷикистон ягона давлате аст, ки ба Афғонистон ҳеҷ зарар намеорад ва танҳо манфиаташ мерасад, Сарвари Тоҷикистон Эмомалӣ Раҳмон бошад, касе аст, ки дар минтақа ва ҷаҳон аз манофеи мардум ва давлати Афғонистон ба таври шоиста пуштибонӣ мекунад». Онҳо ҳамчунин хулоса карданд: — «меарзад, ки ба Тоҷикистон барои бунёди сафораташ аз ин ҳам ҷойи бештару беҳтар дода шавад».