ЁДИ НЕК АЗ АЛЛОМАИ ЗАМОН

           Душанбе, 13 октябр. (АМИТ «Ховар», Мавҷуда Анварӣ).-Чанде пеш дар Маркази фарҳангии Сафорати Ҷумҳурии Исломии Эрон дар Деҳлии Ҳиндустон 26-умин ҷаласаи Анҷумани адабии Бедил баргузор гардид, ки мавзӯи кори он ба осору рӯзгори мутафаккирони оламшумули Шарқ Мир Сайид Алии Ҳамадонӣ ва Ғании Кашмирӣ бахшида шуд.             Дар кори он шоиру нависандагон, пажӯҳишгарон, намояндагони дипломатии муқими ин кишвар ва ҳаводорони каломи маърифатии ҳарду нобиғаи нотакрори ирфон аз манотиқи гуногун иштирок намуданд.             Дар рафти кори Анҷуман Сафири Ҷумҳурии Тоҷикистон дар Ҳиндустон С. Саидов суханронӣ намуда,  аз моҳияти осор ва фаъолияти маърифатии Мир Сайид Алии Ҳамадонӣ ва обрӯву эътибори ин алломаи замонаҳо   ёдовар гардид.             Дар ин бора ба хабарнигори АМИТ «Ховар» аз департаменти иттилоотии ВКХ ҶТ иттилоъ доданд.