БОЗ ДУ ДАВРАИ ЭМКУНӢ БОҚӢ МЕМОНАД

Душанбе, 22 ноябр. (АМИТ «Ховар», Лаззат Диловарзод).- Бино ба гуфти директори генералии маркази эмгузаронии ҷумҳурӣ Шамсиддин Ҷобиров, соли оянда боз ду давраи эмгузаронии кӯдакон дар назар аст. Акнун Вазорати тандурустии ҷумҳурӣ чӣ гуна қарор қабул мекунад ва ташкилоти байналмилалии тандурустӣ чӣ тавсия пешниҳод мекунад ин ба салоҳдиди онҳо вобаста аст. Аммо соли 2011 боз дар ду давра эмгузаронии кӯдакон бар зидди бемории фалаҷ пешбинӣ шудааст. Ин ба он вобаста аст, ки ҳангоми эмгузаронӣ ҷӣ қадар барангезандаҳои зидди бемории фалаҷ дастрас мегардад.    — Мо эмгузарониро то давраи пайдо кардани боварӣ тавассути назорати эпидемиологӣ, ки ин навъи беморӣ дигар вуҷуд надорад, давом медиҳем,- мегӯяд Ш. ҷобиров.    Боис ба ёдоварист, ки ҳодисаи охирини бемории фалаҷ (полиомиелит) ҳанӯз 4 – уми июли соли 2010 ба қайд гирифта шуда буд.    Танҳо баъд аз пешниҳоди далели мӯътамад дар бораи вуҷуд надоштани бемории фалаҷ дар ҷумҳурӣ, ба Тоҷикистон статуси кишвари озод аз бемории фалаҷ дода мешавад.