НИСФИ МАБЛАҒИ БУҶА БАҲРИ РУШДИ МАОРИФ

Бадахшон, 18 ноябр. ( АМИТ «Ховар», Л. Додо).- Дар  ВМКБ  тайи  6  соли охир    ба  хотири  рушди соҳаи маориф  беш  аз  100  миллион  сомонӣ  маблағ   масраф  гардидааст. Ҳар  сол  50  дар  сади  буҷаи вилоят  дар  ихтиёри  маорифчиён  қарор  дорад.  Аз  соли  2008  то  ин  ҷониб  дар  ҳудуди  вилоят  68  мактаби  замонавӣ  бунёд  гардид.  Дар  ноҳияи  Ванҷ  50  мактаб  фаъолият  дорад, ки   бинои  аксари ин мактабҳо  дар даврони  Истиқлолият  бунёд  гардидаанд.  Дар  солҳои  охир  бошад  ҳар  сол 3 – 4    мактаб  мавриди  истифодаи хонандагон  қарор  мегирад. Кулли  мактабҳои  миёна  дорои  утоқҳои  компютерианд.            То  охири  соли  ҷорӣ  боз  ду  мактаби нав   мавриди  истифода  қарор  мегирад.   Қисмати зиёди омӯзгорони  макотиби  ноҳия  хатмкардаҳои  донишгоҳҳои  омӯзгории  кишваранд. Дар  даврони  истиқлолият, ба  вижа, солҳои  охир  ҳар  сол  то  10 – 12  нафар  хатмкардаҳои  макотиби  ноҳия  шомили  калонтарин донишгоҳҳои   кишвар ва берун аз он   мегарданд.