ҲАВОИ НОМУСОИД-МОНЕИ ПАРВОЗ

Душанбе, 22 декабр. (АМИТ «Ховар», Мавҷуда Анварӣ).-Дар аксар минтақаҳои Федератсияи Россия сармо фаро расидааст ва вазъи обу ҳаво баъзан имкон намедиҳад, ки парвозҳо саривақт сурат гиранд. Аз ин хотир ҳавопаймо бо хатсайри 628 Москва (Домодедово)-Душанбе, 221 ва 223 Внуково –Душанбе бо дермонии аз 11 дақиқа то 1 соату 14 дақиқа ба фурудгоҳи Душанбе нишастанд. Субҳи имрӯз хатсайри Алмаато-Душанбе бо сабаби ба парвоз мувофиқ набудани вазъи ҳавои Алмаато 1 соату 35 дақиқа дер ба фурудгоҳ фуруд омад. Дермонӣ дар дигар самтҳо низ ба миён омад ва то соати 15 ҳама он хатсайрҳое, ки бояд ба Душанбе меомаданд ва баръакс аз фурудгоҳи Душанбе парвоз мекарданд, пурра анҷом дода шуданд. Айни замон фазои фурудгоҳи Душанбе ғуборолуд аст, лекин меъёри қабули ҳавопаймоҳо риоя мегардад ва қабулу гусели ҳавопаймоҳо бомуваффақият идома дорад.