ХИЁБОНҲОИ ШАҲР ОРОИШИ ҶАШНӢ МЕГИРАНД

Душанбе, 14 декабр.(АМИТ «Ховар», Марзия Саидова).-Масъалаи омодагии пойтахт ба ҷашни  20-умин солгарди Истиқлолияти давлатии Ҷумҳурии Тоҷикистон аз масъалаҳои умдае буд, ки дар ҷаласаи шаҳрдорӣ мавриди баррасӣ қарор гирифт.     Раиси шаҳри Душанбе Маҳмадсаид Убайдуллоев бо назардошти арзиши баланд доштани ҷашни мазкур ва нақшаҳои ободонии тамоми соҳаҳои пойтахт, комиссияҳои ваколатдори Маҷлиси вакилони халқи шаҳри Душанберо муваззаф сохт, ки  дар таносуби соҳа ва ноҳияҳои шаҳр ҷараёни корҳои анҷомгирифтаро мавриди санҷиш қарор дода, ба унвони шаҳрдорӣ ахбори расмӣ пешниҳод созанд.        Инчунин, Сарраёсати меъморӣ ва шаҳрсозии шаҳри Душанбе вазифадор гардид, ки то 25 декабри соли равон дар ҳамкорӣ бо раисони ноҳияҳо, Муассисаи давлатии «Рекламаи берунӣ ва ороиши шаҳри Душанбе» ва дигар ширкатҳои дизайнерӣ дар Шӯрои шаҳрсозӣ масъалаи ороиши мавзӯии кӯчаву хиёбон ва маҳаллаву шаҳракҳоро баррасӣ намуда, бо интихобу тасдиқи ҳар кадоми он назорати иҷрои онҳоро аз ҷониби масъулин таъмин созад.