КАМБИЗОАТӢ СИЛ МЕПАРВАРАД

Кӯлоб, 23 декабр. (АМИТ «Ховар», Сулаймон Холов).- Дар минтақаи Кӯлоб ба  ғайр аз  бемории сил  теъдоди  дигар  бемориҳои  хавфнок  нисбат  ба  солҳои пешин  кам  гардидааст,  иттилоъ  дод  Саид Аламов,  сардори идораи  санитарию эпидемиологии  минтақаи  Кӯлоб. Аламов афзуд, ки  теъдоди  беморони  гирифтори сӯхтанӣ,  буғумдард ва дигар бемориҳои сироятӣ назар ба соли пешин имсол коҳиш ёфтааст. Аммо  гирифторони  бемории  сил  мисли  солҳои қаблӣ  дар  ҳоли  афзоиш  қарор  доранд. Агар   дар  соли 2009  теъдоди  гирифторони  ин беморӣ ба 1065  нафар   мерасид,    имсол  ин  шумора  ба  1095 нафар расидааст,  мегӯяд Аламов. Мушоҳидаҳо собит  намуданд, ки  сабаби  зиёд  шудани  теъдоди  бемории  сил  дар  минтақаи  Кӯлоб паст  будани  сатҳи   зиндагии  мардум аст. Аз  шумораи  умумии гирифторони  ин  бемории  сироятӣ 135 нафарашон  дар  маркази  мубориза  бар зидди бемориҳои  сил  бистарӣ  мебошанд. Зимни  сӯҳбат  бо  беморон  маълум гардид, ки танҳо  шумораи  ками онҳо  шароити  хариди  доруҳои  гароннархро доранд.