НИЁЗИ КУМИТАИ АНДОЗ БА КАДРҲОИ БАЛАНДИХТИСОС

Душанбе, 17 декабр. (АМИТ «Ховар», Раъно Нусратуллоева).- Имрӯз дар Донишкадаи иқтисодии Тоҷикистон вохӯрии намояндагони Кумитаи андози назди Ҳукумати Ҷумҳурии Тоҷикистон бо омӯзгорон ва донишҷӯёни Донишкада баргузор гардид. Дар ҷараёни вохӯрӣ масъалаҳои марбут ба тақвияти ҳамкории Кумитаи андоз бо ин мактаби олии мамлакат мавриди баррасӣ қарор  гирифт. Дар мулоқот муовини раиси Кумитаи андоз Пӯлодҷон Юсуфов, ҷонишини сардори раёсати методология ва такмили маъмурияти андози Кумита Холис Исломиддинов ва сардори раёсати кадрҳо ва корҳои махсуси он Гулмаҳмад Пиров сухан карда, роҳбарияти донишкадаро даъват намуданд, ки барои  Кумитаи андоз мутахассисони баландихтисоси соҳаи андоз  тайёр намоянд.  Сипас, намояндагони Кумита ба саволҳои сершумори донишҷӯён ҷавоб доданд. Мухбири АМИТ «Ховар» хабар медиҳад, ки  дар Донишкадаи иқтисодиёт барои таҳсили донишҷӯён ва васеъ кардани ҷаҳонбинии онҳо тадбирҳои муфид андешида мешавад. Аз ҷумла, имрӯз шумораи нахустини моҳномаи донишкада таҳти унвони «Иқтисодиёт» аз чоп баромад. Моҳномаи мазкур дар бораи фаъолияти дохилии донишкада, рӯйдодҳои навини иқтисодии Тоҷикистон ва ҷаҳон хабару мақолаҳо чоп мекунад. Инчунин, дар донишкада маҳфилҳои гуногун ташкил   шудаанд.