ЗАХИРАҲОИ ОБИИ ҶАҲОНРО НАЗОРАТ МЕБОЯД

Душанбе, 1 декабр. (АМИТ «Ховар», Пайрав Назаров).- 30 ноябр дар  қароргоҳи СММ дар шаҳри Ню-Йорки Амрико  таҳти унвони «Ҳавасманднамоии ҳамкориҳо дар соҳаи захираҳои об ва гуфтугӯи манфиатовару мақсаднок дар самти тараққиёт, ки дар Декларатсияи ҳазорсола нишон дода шудааст», конфронс баргузор гардид. Ёдовар мешавем, ки конфронси мазкур аз ҷониби Намояндагии доимии Тоҷикистон дар ҳамкорӣ бо шабакаи   «СММ- захираҳои об» ташкил гардид. Дар конфронс китоби « Садоҳои об» муаррифӣ шуд. Дар китоби мазкур  77 муаллиф  аз тамоми ҷаҳон    аҳамияти Даҳсолаи байналмилалии амалиёти «Об барои ҳаёт»-ро, ки бо иқдоми Тоҷикистон пешниҳод шуда буд, бори дигар ёдовар шуданд.  Иштирокдорони конфронс зикр намуданд, ки миёни рушди иқтисод ва рушди захираҳои об алоқаи зич мавҷуд аст. Дар  суханрониҳои дар конфронс садодода  зикр гардид, ки то соли 2030-юм 47 фоизи аҳолии рӯи замин ба мушкилоти таъмини об ва норасоии он мувоҷеҳ мегарданд. Аз ин рӯ  сухангӯён барои беҳтар намудани назорат аз болои захираҳои об дар тамоми ҷаҳон даъват намуданд.  Иштирокчиёни  чорабинии мазкур давлатҳоеро, ки дар ҳавзаи дарёҳои байнисарҳадӣ ҷойгиранд, даъват намуданд, ки гуфтугӯ ва ҳамкориҳоро боз ҳам таҳким бахшанд.