ЧАРОҒИ ХАЙЁМПАЖӮҲОН

      Душанбе, 7 январ.(АМИТ «Ховар», Марзия Саидова). — «Умари Хайём нобиғаи тамаддуни ҷаҳонӣ». Таҳти чунин унвон Пажӯҳишгоҳи фарҳанги  форсӣ-тоҷикии Сафорати Ҷумҳурии Исломии Эрон дар Ҷумҳурии  Тоҷикистон китоби шоир ва донишманди шинохтаи тоҷик Усмон Назирро дар нашриёти «Пайванд» аз чоп баровард. Китоб бо теъдоди 800 адад нашр гардидааст.             Дар китоб маҷмӯаи мақолаҳои муҳаққиқи варзидаи тоҷик Усмон Назир, ки дар солҳои гуногун дар бораи шоир ва мутафаккири бузурги форс Умари Хайём бо  забонҳои тоҷикию русӣ таълиф намудааст, гирдоварӣ шудаанд.             Алиасғари Шеърдӯст сафири Ҷумҳурии Исломии Эрон дар   Тоҷикистон дар сарсухани китоб зери унвони «Ҳамроҳ бо пири Нишопур» доир ба мақоми ҳаким Умари Хайёми Нишопурӣ дар  ташаккули тамаддуни ҷаҳонӣ ибрози назар намудааст.             Дипломати эронӣ нашри маҷмӯаи мақолаҳоро роҷеъ ба Хайём чароғи фаророҳи хайёмпажӯҳон ва қадами муассир дар ташаккули фарҳангу мероси дурахшони муштараки ду кишвари  ҳамзабон ва ҳамдину ҳамфарҳанг- Тоҷикистону Эрон арзёбӣ  намудааст.