НАСБИ ҲИСОБКУНАКҲОИ БАРҚӢ ДАР КӮЛОБ

   Кӯлоб, 28 январ. (АМИТ «Ховар», С.Холов). – Дар шаҳри Кӯлоб пардохти ҳаққи хизматрасонии нерӯи барқ аз ҷониби ташкилоту муассиса ва аҳолӣ сол аз сол коҳиш меёбад. Абдунабӣ Илёсов муовини директори ҶСК шабакаҳои барқи шаҳри Кӯлоб вобаста ба ин мавзӯъ гуфт, ки ҷамъи умумии қарзи ташкилоту корхонаҳои саноатӣ ва аҳолӣ ба 17 миллиону 947 ҳазору 100 сомонӣ расидааст, ки ин нисбат ба соли гузашта 6 миллиону 739 ҳазору 800 сомонӣ зиёд аст.     Бештар корхонаҳои саноатӣ-11 ҳазору 900 сомонӣ, хоҷагии қишлоқ-58 300 сомонӣ, корхонаи обу ташноб- 975 708 сомонӣ ва дигар ташкилотҳо қарздоранд, ки масъулини ин корхонаҳо нисбат ба пардохти ҳаққи барқ беэътиноӣ зоҳир намуда, то ин муддат маблағи истифодаи барқро пардохт накардаанд.   Абдунабӣ Илёсов афзуд, ки айни замон кормандони фурӯши барқ ба насб кардани ҳисобкунакҳои барқӣ машғул буда то ин муддат 2150 муштариро бо ҳисобкунакҳои барқӣ таъмин намудаанд.