СУҒДИЁН 4560 ГЕКТАР БОҒУ ТОКЗОРИ НАВ БУНЁД МЕКУНАНД

   Душанбе, 17 январ. (АМИТ «Ховар», Бекназари Абӯбакр). — Дар давоми соли 2010 ҳаҷми умумии маҳсулоти кишоварзӣ дар ҳамаи шаклҳои хоҷагидории вилояти Суғд 2709,2 миллион сомониро ташкил дод, ки ин нишондод нисбат ба ҳамин давраи соли 2009-ум 108,1 фоизро ташкил медиҳад. Дар ин бора ба АМИТ «Ховар» аз хадамоти матбуоти раиси вилояти Суғд иттилоъ доданд.    Зиёдшавии ҳаҷми маҳсулоти соҳа асосан аз ҳисоби истеҳсоли пахта, сабзавот, меваҷот, ғалла, картошка ва полезиҳо мебошад.  Бо мақсади афзун намудани парвариши ниҳолҳои дарахтони мевадиҳандаю ҳамешасабз, бунёд ва барқарор намудани боғу токзор чораҳои зарурӣ амалӣ шуда, мувофиқи нақша дар қаламрави вилоят 5778,2 гектар боғу токзори нав бунёд шудааст. Барқароркунии боғу токзор бошад 1161,7 гектарро ташкил намуд, ки ин барои зиёд намудани истеҳсоли мевагиҳо заминаи мусоид мегардад.   Ба нақша гирифта шудааст, ки дар соли 2011-ум дар қаламрави вилояти Суғд 4560 гектар боғу токзори нав бунёд гардад.