ВУСЪАТИ ИНШООТИ ҶАШНӢ ДАР ТУРСУНЗОДА

    Душанбе, 12 январ. (АМИТ «Ховар», Назокат Қодирова).- Дар шаҳри Турсунзода бахшида ба 20- умин солгарди Истиқлолияти давлатии Ҷумҳурии Тоҷикистон сохтмони 26 иншооти ҷашнӣ бо муваффақият идома дорад.  Тавре аз шўъбаи сохтмони умумии ҳокимияти иҷроияи мақомоти давлатии шаҳр хабар доданд, 5 мактаби таҳсилоти ҳамагонӣ, 5 бунгоҳи тиббӣ ва дигар иншооти истеҳсолию иҷтимоӣ аз шумори иншооти сохташавандаи ҷашнианд, ки барои сохтмони онҳо аз ҳисоби буҷаи Ҳукумати Ҷумҳурии Тоҷикистон маблағҳои муайян ҷудо гаштааст.  Танҳо барои сохтмони мактабҳои миёна ва таҷдиди онҳо аз ҳисоби Ҳукумати Ҷумҳурӣ лоиҳаҳои инвеститсионӣ ба маблағи 10 млн. сомонӣ амалӣ мегарданд.   Дар назар аст, ки иншооти мазкур то ҷашни 20- солагии Истиқлолият сохта мешаванд. Баробари ба фаъолият пардохтани ин иншоот 300 нафар шаҳрванди ин минтақа бо ҷойи кор таъмин мегарданд, ки ба ин васила сиёсати стратегии Ҳукумати Ҷумҳурии Тоҷикистон оиди бо фаъолияти самаранок ва ҷойи кор таъмин намудани мардуми кишвар ҳалли худро меёбад.