ВУСЪАТИ ИНШООТИ ҶАШНИИ ҲИСОР

   Ҳисор, 15 январ. (АМИТ «Ховар», Ҳотам Рабиев ). – Лоиҳаи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» — ро кулли сокинони ноҳияи Ҳисор тавассути ташкили ҷаласаҳо дар ҷамоатҳо, мактабҳо ва корхонаву муассисаҳо мавриди баррасӣ қарор дода, фикру андешаҳои худро оид ба моддаҳои алоҳидаи он баён менамоянд, — иброз дошт зимни нишасти матбуотӣ раиси ноҳияи Ҳисор Баҳриддин Солеҳов.   Лоиҳаи Қонуни мазкур тавассути рӯзномаи ноҳиявии «Ҳисори Шодмон» ва дар шакли китобчаи алоҳида бо теъдоди зиёд дастраси аҳолӣ гардид.  Зимни нишаст раиси ноҳия дар мавриди соҳаи кишоварзӣ гуфт, ки бо сабаби бебориш омадани тирамоҳи имсола дар 70 фоизи заминҳои киштшаванда кишти ғалладонагӣ гузаронида шуд, ки ин 3 ҳазору 559 гектарро ташкил медиҳад.  Корҳои ободонию сохтмонӣ бахшида ба 20 – умин солгари Истиқлолияти давлатии Ҷумҳурии Тоҷикистон дар ноҳияи Ҳисор суръат ва вусъати тоза меёбанд. Бахшида ба ин ҷашни фархунда зиёда аз 20 иншооти хурду бузург ба истифода дода мешаванд.