Мактабиён забони англисӣ меомӯзанд

Душанбе, 15 июл. (АМИТ «Ховар», Людмила Дубинина). – Наврасони шаҳри Душанбе ва атрофи он тайи соли ҷорӣ дар Маркази маърифатии «Мултикид» бо роҳбарии муаллимаи дорои мартабаи ҷаҳонӣ Нурия Кабрера сарфу навҳи забони англисиро омӯхта, ҳоло дар курсҳои такмили нутқи шифоҳӣ дарс мехонанд. Мақсади асосии ин машғулият баланд бардоштани малакаи нутқи шифоҳии наврасон ва рафъи монеаҳои гуфтор ба забони англисӣ мебошад. Машғулият басо шавқовару ҷолиб мегузарад, зеро муаллима ҷиҳати муҳокима мавзӯҳоеро интихоб менамояд, ки барои хонандагон душвориҳо эҷод намекунанд. Ғайр аз ин, наврасон дар рафти машғулият ба муаллимаашон Нурия Кабрера аз диёри худ — Тоҷикистони азизашон нақл мекунанду муаллима дар навбати худ ба бачаҳо аз ҳаёти мардуми Испаниё ва кишварҳои дигари ҷаҳон маълумот медиҳад.«Ман кӯшиш менамоям, ки бачаҳо баъди хатми машғулият ба забони англисӣ озоду ҷасурона ҳарф зананд, — мегӯяд Нурия Кабрера. – Ҳоло наврасон забони англисиро ба дараҷаи хуб ёд гирифтаанд ва умедворам, ки дар оянда натиҷаҳои аз ин ҳам беҳтар ба даст меоранд. Ният дорам, ки дар оянда ҳам ба шаҳри Душанбе омада, дар Маркази маърифатии «Мултикид» ба наврасон аз забони англисӣ дарс диҳам».