Устоди бузург аз олам даргузашт

Душанбе, 15 июл. (АМИТ «Ховар»). – 14 июли соли 2011 номзади илми ҳуқуқ, дотсент, декани факултаи ҳуқуқи Донишгоҳи Миллии Тоҷикистон Кароматулло Холиқов дар синни 54- солагӣ аз олам даргузашт. Шодравон тӯли умри бобаракати хеш дар соҳаҳои гуногуни хоҷагии халқ фаъолият намуда, дар тарбияи ҷавонон саҳми босазо гузоштааст. 23 феврали соли 2011 марҳум ба вазифаи муовини раиси Комиссияи марказии интихобот ва раъйпурсии Ҷумҳурии Тоҷикистон тайин гардид.Кароматулло Холиқов инсони шариф ва дорои хислатҳои неки инсонӣ — олиҳимматӣ, беғаразӣ, инсондӯстӣ ва меҳнатдӯстӣ буд. Шодравон шахси донишманд, роҳбари серталаб, омӯзгор ва ҳуқуқшиноси бомаҳорат ба ҳисоб мерафт. Маросими видоъ 15 июл дар зодгоҳаш- дар наздикии маҳаллаи Андигони ноҳияи Ваҳдат доир гардида, марҳум дар ҳамон ҷо ба хок супорида шуд.