Эътибори ҷиддӣ ба соҳаи маориф

Хоруғ, 26 август. (АМИТ «Ховар», Л.Додо). – Соли таҳсилро хонандагони мактабҳои деҳаҳои Шод ва Сумҷеви ноҳияи Роштқалъа дар синфхонаҳои наву барҳаво истиқбол мекунанд. Соли ҷорӣ дар доираи омодагӣ ба ҷашни 20 – умин солгарди Истиқлолияти давлатии Ҷумҳурии Тоҷикистон бо дастгирии Ҳукумати ҷумҳурӣ дар ин рустоҳо биноҳои нави замонавӣ бунёд гардиданд.Мудири шӯъбаи маорифи ноҳияи Роштқалъа Гулаёз Абдолбеков иттилоъ дод, ки солҳои истиқлолият дар ноҳия бинои 15 мактаб бунёд гардид, ки дорои шароити таҳсиланд. Маорифчиёни ноҳия аз он шукргузоранд, ки соҳаи маориф таҳти назорати бевоситаи Президенти кишвар қарор дорад. Агар 5 сол қабл маблағгузорӣ барои соҳаи маорифи ноҳия 2 миллион сомониро ташкил дода бошад, соли ҷорӣ ба 4 миллион сомонӣ расидааст.