Иштирокчиёни ҷаласа бо шароити зиндагии марзбонон шинос мешаванд

Душанбе, 22 сентябр. (АМИТ «Ховар», Лутфия Эшонқулова).-Дирӯз, 21 снтябри соли 2011 дар меҳмонхонаи «Истиқлол» -и пойтахт ҷаласаи навбатии Шӯрои фармондеҳони қӯшунҳои наздисарҳадии кишварҳои узви ИДМ ба кори худ шурӯъ намуд.Дар ҷаласа намояндагони мақомоти наздисарҳадии кишварҳои Арманистон, Беларус, Қазоқистон, Қирғизистон, Русия ва Тоҷикистон иштирок доранд. Дар кори ҷаласа аз ҷониби Тоҷикистон муовини фармондеҳи қӯшунҳои Кумитаи давлатии амнияти миллии ҶТ Шараф Файзуллоев иштирок дорад.  Дар рӯзномаи ҷаласа баррасии масоили ҳамкории ҷонибҳо баҳри ташкили назорати наздисарҳадӣ, ҳамкорӣ дар бахши пешгирии муҳоҷирати ғайриқонунӣ, беҳ намудани кори нуқтаҳои назоратӣ-иҷозатӣ ва таҳияи роҳҳои нави ҳалли он ҷой дода шудаанд.Имрӯз ҷаласа ба кори худ анҷом мебахшад. Аз рӯи машғулияти амалӣ тибқи нақша иштирокчиёни ҷаласа ният доранд ба марзи Тоҷикистону Афғонистон ба нуқтаи назоратӣ-иҷозатии «Панҷи Поён» сафар намуда, бо шароити адои хизмат, истироҳат ва зиндагии марзбонон шинос шаванд.