Кормандони ҳифзи ҳуқуқ забони англисиро меомӯзанд

Душанбе, 15 сентябр. (АМИТ «Ховар», Лутфия Эшонқулова). – Шӯъбаи назорати маводи нашъаовар ва ҳифзи тартиботи Сафорати Иёлоти Муттаҳидаи Амрико зимни ҳамкорӣ бо Зе Эмерженс Групп курси омӯзиши забони англисиро барои муаллимони Маркази таълимии Вазорати корҳои дохилӣ ва фарзандони онҳо доир намуд.Тавре дар Сафорати ИМА дар Тоҷикистон ба АМИТ «Ховар» иттилоъ доданд, барномаи ин курси семоҳа иборат аз омӯхтани сарфу навҳ, хондану навиштан, нутқи шифоҳӣ, талаффуз ва захираи луғавӣ буд. Ҳукумати Иёлоти Муттаҳида ният дорад, ки мақомоти ҳифзи ҳуқуқи Тоҷикистонро дастгирӣ намояд ва умедвор аст, ки ҳамкорӣ барои татбиқи лоиҳаҳои минбаъдаи муштарак густариш хоҳад ёфт. Аз соли 2003 кӯмаки Шӯъбаи назорати маводи нашъаовар ва ҳифзи тартиботи Сафорати ИМА ба муассисаю идораҳои Ҷумҳурии Тоҷикистон ҷиҳати дастгирии амнияту волоияти қонун беш аз 52 миллион доллари ИМА – ро ташкил дод.