Таъминот бо лампаҳои каммасраф

Душанбе, 26 сентябр. (АМИТ «Ховар», Дилшодаи Хайруллоҳ). — Солҳои охир бо супориш ва дастгирии Ҳукумати Ҷумҳурии Тоҷикистон, мақомоти давлатӣ ва хадамоти энергетикӣ дар маҳалҳо барои истифодаи васеи лампаҳои каммасраф корҳои зиёд ба анҷом расиданд. Тайи ду соли охир дар ҷумҳурӣ 1 млн. 42 ҳазор оила бо 8 млн. 154 ҳазор лампаи каммасраф, аз ҷумла 240 ҳазор оилаи камбизоат бо 1 млн. 924 ҳазор чунин лампа таъмин гаштанд. Ғайр аз ин, 33 ҳазор корхонаву муассисаҳои ҷумҳурӣ 759 ҳазор лампаи тафсонро ба лампаҳои каммасраф иваз намуданд. Танҳо дар 8 моҳи соли равон 49,3 ҳазор оилаи камбизоат бо кӯмаки соҳибкорони ватанӣ бо 201,3 ҳазор лампаи каммасраф таъмин гаштанд. Аз ҷумла, дар вилояти Суғд — 19,5 ҳазор оила бо 59,5 ҳазор лампа, дар вилояти Хатлон – 27 ҳазор оила бо 132,7 ҳазор лампа, дар Вилояти Мухтори Кӯҳистони Бадахшон – 627 оила бо 2 ҳазор лампа, дар ноҳияҳои тобеи ҷумҳурӣ – 2,2 ҳазор оила бо 7 ҳазор лампаи каммасраф таъмин гардиданд, ки ин кор дар оянда ҳам идома хоҳад ёфт.