Атраксионҳои итолиёвӣ бе пардохти боҷи гумрукӣ ворид карда мешаванд

Душанбе, 21 декабр.(АМИТ «Ховар», Марзия Саидова).- Бо ворид намудани илова ба Қонуни Ҷумҳурии Тоҷикистон «Дар бораи Буҷаи давлатии Ҷумҳурии Тоҷикистон барои соли 2011» мақомоти иҷроияи маҳаллии ҳокимияти давлатӣ дар шаҳри Душанбе барои аз Италия овардани 34 адад атраксион барои Боғи фарҳангу фароғатии шаҳр, воқеъ дар маҳаллаи Буни Ҳисорак аз пардохти боҷи гумрукӣ ва андоз аз арзиши иловашуда озод гардонида мешавад. Зимни тавзеҳи лоиҳаи қонуни мазкур дар палатаи поёнии парлумони ҷумҳурӣ 21 декабр Ҷамшед Норинов, муовини вазири молияи ҷумҳурӣ афзуд, ки арзиши атраксионҳое, ки аз Италия ворид мегарданд, 6, 7 миллион евро ё худ 43 миллион сомонӣ буда, маблағи боҷи гумрукӣ ва андози арзиши иловашудаи он 10, 4 миллион сомониро ташкил медиҳад. Ҳамзамон дар назди вакилон муовини раиси шаҳри Душанбе Сайвалӣ Сафаров, ки масъули бахши иқтисоди шаҳрдорист, афзуд: тибқи нақша ворид намудан ва насби атраксионҳо дар Боғи фарҳангу фароғатии умумишаҳрӣ бояд то охири соли равон сурат мегирифт. Алҳол қисме аз ин таҷҳизот ба Тоҷикистон оварда шудааст ва насби тамоми атраксионҳо то нимаи дуюми соли 2012 ба анҷом расонида мешавад. 16.00.