Дар роҳҳо яхбандӣ ба амал меояд

Душанбе, 20 декабр.(АМИТ «Ховар», Марзия Саидова).- То 23 декабр ҳаво дар ҷумҳурӣ сарду бебориш боқӣ монда, танҳо дар минтақаҳои кӯҳии кишвар каму беш боридани барф мушоҳида мегардад. Дар ин хусус ба АМИТ «Ховар» Ҷамила Байдуллоева, сардори маркази обуҳавошиносии Муассисаи давлатии обуҳавошиносии ҷумҳурӣ иттилоъ дод. Мавсуф афзуд, ки дар натиҷаи бархӯрди ҳавои сард аз қисмати шимол ва мавҷи ҳавои гарм аз самти ҷануби ҷумҳурӣ муддати як шабонарӯз дар минтақаҳои ҷанубии кишвар- шаҳру ноҳияҳои вилояти Хатлон, ноҳияҳои тобеи марказ ва шаҳри Душанбе барфи хушк борид, ки баландиаш дар пойтахти ҷумҳурӣ ба 27 сантиметр расид. Дар натиҷа ҳарорати ҳаво дар ҷумҳурӣ хеле паст фаромад. Масъули идораи ҳавошиносии кишвар мегӯяд, ки бинобар боридани барфи хушк ва вазидани шамоли сард то 23 декабр дар роҳҳои ҷумҳурӣ яхбандӣ ба амал омада, ҳарорати ҳаво дар Душанбе шабона то 10-12 дараҷа ва рӯзона 5-7 дараҷа сард мегардад. Дар вилояти Хатлон бошад ҳаво шабона 6-11, рӯзона 0-5 дараҷа ва дар ноҳияҳои тобеи марказ шабона 8-13, рӯзона 0-5 дараҷа хунук мешавад. Сардии ҳаво дар вилояти Суғд шабона 10-15, рӯзона 1-6 ва дар минтақаҳои кӯҳии вилояти мазкур шабона 12-17, рӯзона 3-8 дараҷаро ташкил медиҳад. Ҳарорати ҳаво дар Вилояти Мухтори Кӯҳистони Бадахшон шабона 6-11, рӯзона 1-6 ва дар минтақаҳои баландкӯҳи вилоят шабона 22-27, рӯзона 7-12 дараҷа сард мегардад. Дар робита ба ин намояндаи маркази обуҳавошиносии кишвар меафзояд, ки бинобар сард гардидани ҳаво тайи чанд шабонарӯзи оянда ва ба амал омадани яхбандӣ дар роҳҳои кишвар масъулини идораҳои марбутаи роҳтозакунии шаҳру ноҳияҳои ҷумҳуриро зарур аст, ки ҷиҳати таъмини бехатарии ҳаракати нақлиёту мусофирон роҳҳоро тоза кунанд ва зимни ин аз маводи зидди лағшиш истифода баранд.