Семинари Бонки Ҷаҳонӣ доир ба барқ

Душанбе, 15 феврал. (АМИТ «Ховар», Дилшодаи Хайруллоҳ). – Нимаи дуюми имрӯз дар Вазорати энергетика ва саноати Ҷумҳурии Тоҷикистон семинари гурӯҳи Бонки Ҷаҳонӣ доир ба лоиҳаи «Арзёбии вариантҳои таъминоти барқ дар Ҷумҳурии Тоҷикистон» баргузор гардид. Дар семинар намояндаи Бонки Ҷаҳонӣ, мутахассиси калони захираҳои обу энергетика ва мушовири ширкати «Фихтер» ҷаноби Дэрил Филдз доир ба моҳияти семинар ибрози назар намуд. Дар семинар масъалаҳои вобаста ба самтҳои арзёбии усулҳои таъминоти барқ, дастуру тарзҳои омӯзиши маҷмӯи масъалаҳо, мавод, маълумотҳои дастрасшаванда ва стратегии экологӣ матраҳ гардид. Дар кори он мутахассисони вазорату идораҳои дахлдори ҷумҳурӣ иштирок намуданд. Мӯҳлати лоиҳаи мазкур 9 моҳ муайян карда шуда, баъд аз мувофиқа бо Ҳукумати Ҷумҳурии Тоҷикистон самтҳо ва лоиҳаҳои афзалиятнок дар соҳаи энергетика дар марҳилаҳои миёнамуддат ва дарозмуддат то солҳои 2030 муайян карда мешавад. Семинар кори худро пагоҳ идома хоҳад дод.