Тоҷикистон – Филиппин: ноумедиҳо бо Алиспахич

Душанбе, 14 март. ( АМИТ «Ховар», Аловиддин Бӯриев).- Дастаи мунтахаби футболи мамлакат ҳунарнамоиашро дар бозиҳои Ҷоми даъвати Конфедератсияи футболи Осиё баъди бохт аз дастаи мунтахаби Филиппин бо натиҷаи 1 бар 2 ба анҷом расонд. Ҳамин тариқ, мураббии тозаинтихоб Камол Алиспахич ҳам барои ба комёбӣ ноил кардани дастаи мо муваффақ нашуд. Ёдрас мешавем, ки танҳо ба Шариф Назаров муяссар шудааст, ки соли 2006 –ум тими мунтахаби моро ба гирифтани чунин Ҷом шарафёб гардонад. Бозиҳои навбатии расмӣ барои тими миллии Тоҷикистон дар ҳамин ҷо то ду соли наздик ба охир расиданд. Дастаҳои Туркманистон, Филиппин, Куриёи Шимолӣ ва Фаластин муборизаро барои Ҷоми КФО идома медиҳанд.