Қадрдонии Искандар

Душанбе, 11 апрел. (АМИТ «Ховар», Дилшодаи Хайруллоҳ).- Раёсати Донишгоҳи технологии Тоҷикистон дар доираи татбиқи дастуру супоришҳои Президенти Ҷумҳурии Тоҷикистон Эмомалӣ Раҳмон, ки дар мулоқот бо варзишгарони кишвар аз 20 декабри соли 2010 баён гардид, ҷиҳати рушди варзиш дар донишгоҳ тадбирҳои зарурӣ меандешад. Искандари Рустам – факултаи «Технологияҳои барномасозӣ»-и филиали Донишгоҳи технологии Тоҷикистон дар шаҳри Кӯлоб аз рӯйи намуди гӯштини озод дар олимпиадаи байналмилалӣ, ки дар шаҳри Остонаи Ҷумҳурии Қазоқистон шуда гузашт, ҷойи дуюмро соҳиб гардида, бо медали нуқра сарфароз гардид ва ба Бозиҳои ХХХ-юми олимпӣ, ки дар шаҳри Лондон баргузор мегарданд, роҳхат гирифт. Искандари Рустам аз тарафи муовини вазири энергетика ва саноати Ҷумҳурии Тоҷикистон Х. Маҳмадуллоев бо тӯҳфаи хотиравӣ- ноут-бук ва сипосномаи Донишгоҳи технологии Тоҷикистон сарфароз гардида, ба волидайни ӯ лавҳи фахрӣ тақдим карда шуд.