Ҳаҷми қарзҳо ба мизоҷон афзуд

Душанбе, 10 апрел. (АМИТ «Ховар», Покиза Маҳмадбекова). — Бақияи умумии қарзҳо дар охири феврали соли ҷорӣ нисбат ба ҳамин давраи соли гузашта 9,7 фоиз афзуда, ба 4 млрд. 356,6 млн. баробар шуд. Ба мухбири АМИТ «Ховар» роҳбари хадамоти матбуоти дастгоҳи роҳбарияти Бонки миллии Тоҷикистон Абдуғаффор Қурбонов иттилоъ дод, ки аз ин маблағ 1 млрд. 861,2 млн. бо пули миллӣ ва 2 млрд. 495,4 млн. сомонӣ бо асъори хориҷӣ қарз дода шудааст. Ба иттилои манбаъ, дар таркиби бақияи қарзҳо 30,2 фоиз ё 1 317,6 млн. сомониро ҳиссаи қарзҳои дарозмуддат ташкил додаанд, ки нисбат ба соли қаблӣ 3,1 фоиз зиёд шуд. Дар ду моҳи аввали соли равон фоизи миёнавазни қарзҳо дар низом бо пули миллӣ 19,79 фоиз ва бо асъори хориҷӣ 24,01 фоизи солонаро ташкил намуд. Бинобар афзоиши талабот ба маблағҳои озод, ҳаҷми қарзҳои хурд дар моҳҳои мазкур нисбат ба ҳамин давраи соли қаблӣ 33,2 фоиз зиёд гардида, ба 447,3 млн. сомонӣ баробар шуд. Аз ҷумла ба ноҳияҳои дурдасти кӯҳистон , 90,7 млн. сомонӣ қарз дода шуд, ки нисбати ҳамин давраи соли гузашта 26,9 фоиз зиёд аст.