Ҷаласаи муштарак оғоз гардид

Душанбе, 20 апрел.(АМИТ «Ховар», Марзия Саидова).-Имрӯз дар шаҳри Душанбе ҷаласаи сеюми якҷояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон даъвати чорум ба кори худ шурӯъ кард. Ҷаласаи муштарак нахуст бо иштироки аъзои Маҷлиси миллӣ ва вакилони Маҷлиси намояндагон дар толори маҷлисгоҳи Маҷлиси Олии ҷумҳурӣ шурӯъ гардида, баъдан он дар «Кохи Сомон»-и бӯстонсарои ҳукумати ҷумҳурӣ кори худ ро идома медиҳад. Дар ҷаласаи муштараки палатаҳои парлумони мамлакат Президенти ҷумҳурӣ Эмомалӣ Раҳмон ба парлумони кишвар Паёми навбатии худро ирсол менамояд, ки он самтҳои асосии сиёсати дохилӣ ва хориҷии Ҷумҳурии Тоҷикистонро дар бар мегирад. Дар ҷаласаи сеюми яқчояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон даъвати чорум ғайр аз аъзои палатаи болоӣ ва вакилони палатаи поёнии парлумони мамлакат, инчунин намояндагони ҳукумати кишвар, кормандони масъули вазорату идораҳои мамлакат ва корпусҳои дипломатии муқими Тоҷикистон, дар маҷмӯъ 1200 нафар иштирок менамоянд. Хамзамон бобати инъкоси оҷилии ҷараёни баргузории ҷаласаи якҷояи Маҷлиси миллӣ ва Маҷлиси намояндагони Маҷлиси Олии мамлакат даъвати чорум дар «Кохи Сомон» маркази матбуот созмон дода шудааст. Ҳамзамон ҷараёни баргузории ҷаласаи муштараки палатаҳои парлумони мамлакат, ки дар он Сарвари давлат бо Паёми навбатӣ баромад менамояд, тавасути шабакаҳои телевизионҳои давлатӣ ба таври мустақим пахш гардида, инчунин дар сомонаи интернетии Агентии миллии иттилоотии Тоҷикистон «Ховар» мунташир мегардад.