Аз ҳисоби Сангвор Ваҳдат ташкил мешавад
Душанбе, 5 апрел.(АМИТ «Ховар», Марзия Саидова).-Дар Тавилдара аз ҳисоби деҳоти Сангвор деҳоти нав бо номи Ваҳдат ташкил карда мешавад. Дар робита ба ин дар иҷлосияи ҳаштуми Маҷлиси миллии Маҷлиси Олии Ҷумҳурии Тоҷикистон дар асоси пешниҳоди Ҳукумати Ҷумҳурии Тоҷикистон ва илтимосномаи Маҷлиси вакилони халқи ноҳияи Тавилдара қарори марбута қабул гардид. Ташкили деҳоти нав дар Тавилдара ба осон намудани мушкилоти аҳолии қисмати шарқии деҳоти Сангвор рабт дорад, зеро деҳаҳое, ки дар ин маҳал ҷойгиранд, аз маркази деҳоти Сангвор ва маркази ноҳияи Тавилдара дар масофаи дур воқеъ буда, мавҷуд набудани нақлиёти ҷамъиятӣ рафтуои мардумро ба маркази деҳоти Сангвор ва ноҳияи Тавилдара, хусусан дар мавсими тирамоҳу зимистон мушкил мегардонад. Мисол, деҳаи Арзинг аз маркази Тавилдара дар масофаи 130 км, Роға- 120 км, Найгуфт- 106 км, Сикад- 105 ва Хубон дар масофаи 88 км дурӣ қарор доранд. з ҳисоби хурд намудани деҳоти Сангвор ба деҳоти навтаъсиси Ваҳдат деҳаҳои Ғовд, Алисурхон, Нусонӣ, Лангар, Лоҷург, Сарха, Хубон, Сикад, Роға, Арзинг, Сангвор ва Найгуфт бо 2 ҳазору 151 нафар аҳолӣ дохил карда мешавад. Деҳоти Ваҳдат дар масоҳати 2400 километри мураббаъ бо маркази маъмурӣ дар деҳаи Лоҷург таъсис дода мешавад. Бо таъсиси деҳоти нав масофаи байни маркази деҳот ва деҳаҳо кӯтоҳ гардида, масофаи роҳ аз маркази ноҳия то маркази деҳоти навтаъсис 15 км наздиктар мегардад.