Бемории вараҷа пешгирӣ шуд

Душанбе, 20 апрел.(АМИТ «Ховар», Лаззат Диловарзод).- Бино ба гуфти директори Маркази ҷумҳуриявии мубориза бо бемориҳои тропикӣ (вараҷа) Сайфиддин Каримов, бемории вараҷаи тропикӣ яке аз бемориҳои вазнинтарин ба шумор меравад. Тибқи нишондодҳои омории ташкилоти умумиҷаҳонии тандурустӣ, ҳамасола дар ҷаҳон аз бемории вараҷаи тропикӣ аз 1 то 1,5 млн. нафар ҷони худро аз даст медиҳад.Ба иттилои манбаъ, ҳодисаи аввалини вараҷаи тропикӣ дар ҶТ соли 1994 ба қайд гирифта шудааст. Бо сабаби набудани шароити табобат шумораи гирифторони бемории вараҷаи тропикӣ дар ҷумҳурӣ афзуд. Соли 2000-ум шумораи беморони мубталои вараҷаи тропикӣ дар ҷумҳурӣ ба 831 нафар расид. Дар натиҷаи гузаронидани маҷмӯи чорабиниҳои ташхисию табобатӣ шумораи беморон коҳиш ёфт.Ба гуфти С. Каримов, соли 2006 дар ҷумҳурӣ 28 ҳодисаи ин беморӣ, соли 2007 -7, 2008 -2 ва солҳои 2009-2010 як ҳодисаи бемории вараҷаи тропикӣ ба қайд гирифта шудааст.Дар айни замон бо гузаронидани маҷмӯи чорабиниҳо пайдошавӣ ва паҳн гардидани бемории вараҷа пешгирӣ шуд. Бемороне, ки аз хориҷи кишвар ин бемориро бо худ вориди Тоҷикистон мекунанд, дар майдони ҳавоӣ, роҳи оҳан ва ҳангоми вуруд ба кишвар тавассути нақлиёти боркаш аз муоинаи духтурон гузашта, дар ҷойҳои алоҳида нигаҳдорӣ ва табобат мешаванд.