Кишти нахустини пунба дар Суғд

Душанбе, 2 апрел. (АМИТ «Ховар», Бекназари Абӯбакр). — 31- марти соли 2012 дар бригадаи №3-и кооперативи истеҳсолии «Сартуқай» -и ноҳияи Бобоҷон Ғафуров дар вилояти Суғд аввалин шуда мавсими нави кишт шурӯъ гардид. Кооперативи истеҳсолии «Сартуқай» аз хоҷагиҳои пешқадами кишоварзӣ буда, дорои 401 гектар замин аст ва соли ҷорӣ дар 101 гектари он пахтаи навъи маҳаллии «Сайёд» кишт мекунанд. Баробари пошидани пунбаҳои аввалин раиси вилояти Суғд Қоҳир Расулзода бо аъзои хоҷагӣ, ки бо шавқу умеди зиёд мавсими нави кори деҳқониро оғоз кардаанд, вобаста ба шароити кору рӯзгорашон сӯҳбат кард. Хоҷагии мазкур ба ҷуз пахта 216 гектар боғи зардолу, 16 гектар токзор дорад ва дар майдони боқимондаи он шоливу махсулоти дигари кишоварзӣ парвариш мешавад.