Идомаи як моҳи ҷавонӣ

Суғд, 24 май. (АМИТ «Ховар», М.Амонов). – Дар доираи як моҳи ҷавонӣ, ки дар вилояти Суғд идома дорад, 2 ҳазор нафар ҷавонону наврасони шаҳри Хуҷанд ба ҳашари ободонию кабудизоркунӣ баромаданд. Бо ҳиммати онҳо яке аз мавзеъҳои марказии шаҳр — маҳаллаи 30 — солагии Ғалаба боз ҳам хуррамтару обод гардид. Ҷиҳати дарёфти соҳибистеъдодҳо, тарғибу касбу ҳунаромӯзӣ ва мероси ниёгон асарҳои рассомони ҷавонони умедбахш, офаридаҳои меъморон ва ҳунарҳои халқӣ дар толори бахши вилоятии Иттифоқи рассомон тайи 7 рӯз ба намоиш гузошта шуд. Дар ҷараёни як моҳи ҷавонӣ ба хотири дастгирӣ ва мусоидат ба ҳалли мушкилоти рӯзгор дар шаҳру ноҳияҳои вилоят аёдати ҷавонону наврасони маъюб сурат гирифт.