Ҳалокати 5 нафар бар асари садама

Душанбе, 30 июл. (АМИТ «Ховар», Музаффар Рустамов). – Аз 22 то 29 июли соли ҷорӣ дар роҳҳои мошингарди ҷумҳурӣ 21 садамаи роҳу нақлиёт ба қайд гирифта шуд, ки бар асари онҳо 5 нафар ба ҳалокат расида, 29 нафари дигар ҷароҳатҳои гуногуни ҷисмонӣ бардошта дар беморхонаҳо бистарӣ гардид.Аз таҳлили садамаҳои рухдодаи ҳафтаи сипаригардида бармеояд, ки аксари ин ҳодисаҳо дар вилояти Суғд ва ноҳияҳои тобеи марказ ба вуқўъ омадааст. Бештари ин садамаҳои нохуш бо айби ронандагон, яъне баромадан ба самти муқобили ҳаракат, зиёд кардани меъёри суръати ҳаракати воситаи нақлиёт ва аз ҷои номуайян убур намудани пиёдагардон сар задааст. Ҳамин нуқтаро бояд зикр кард, ки бо сабаби рўз аз рўз зиёд гардидани теъдоди воситаҳои нақлиёти гуногунтамға дар роҳҳо он барои кормндони БДА, ки бевосита баҳри таъмини бехатарии ҳаракат дар роҳ масъуланд, душвориҳоро пеш овардааст. Аз ин лиҳоз Раёсати БДА ВКД ҷумҳурии Тоҷикистон аз тамоми иштирокдорони ҳаракат дар роҳ, ронандагону пиёдагардон ва шаҳрвандони гиромӣ талаб ва хоҳиш менамояд, ки пеш аз баромадан ба қисми ҳаракати роҳ талаботи оддитарини ҳаракати роҳро риоя намуда, ҷони худ ва дигаронро зери хатар нагузоранд. Дар ин бора корманди шӯъбаи ташвиқоту тарғиботи Раёсати Бозрасии давлатии автомобилии Вазорати корҳои дохилии ҶТ Маҳмадшариф Шамсов иттилоъ дод.