Ҷашни «Фалак» дар Тоҷикистон

Душанбе, 10 октябр. (АМИТ «Ховар», Раъно Нусратуллоева).-Дирӯз дар Вазорати фарҳанги Ҷумҳурии Тоҷикистон Фестивал — симпозиуми IV байналмилалии «Фалак» ва фарҳанги мусиқиии муосир баргузор гардид. Симпозиумро вазири фарҳанги ҷумҳурӣ Мирзошоҳрух Асрорӣ ифтитоҳ намуд. Сипас доктори илми санъатшиносӣ Фароғат Азизӣ дар мавзӯи «Фалак: осор, пажуҳиш ва таълим», доктори илми санъатшиносӣ, ректори Донишкадаи давлатии санъати Тоҷикистон ба номи М.Турсунзода Аслиддин Низомӣ дар мавзӯи «Маънии «фалак»-ро аз фалак биҷӯ», доктори илмҳои таърих А. Раҷабов дар мавзӯи «Шигифтангезии шифоҳию мардумии назму навои фалак», Ёсин Суммит (ИМА) дар мавзӯи «Аз назарияи мақом то амалияи мақом: Дувоздаҳмақом, Чаҳоршадд, Шашмақом» ва аҳли дигари санъати мусиқӣ сухан гуфтанд. Худи ҳамон рӯз дар Консерваторияи миллии Тоҷикистон ба номи Т.Сатторов ва Донишкадаи давлатии санъати Тоҷикистон ба номи М.Турсунзода ҳунармандони озарӣ ва ансамбли «Коллаж»-и Маркази фарҳанги мусиқии ҳиндуии шаҳри Толяттии Русия, ҳамчунин донишҷӯёни Консерваторияи миллии ҷумҳурӣ ҳунарнамоӣ карданд.Нимаи дуюми рӯз дар Кохи Ҷомӣ консерти ансамбли давлатии «Фалак» бо роҳбарии Ҳунарманди мардумии Тоҷикистон Давлатманд Холов баргузор гардид. Имрӯз Фестивал — симпозиуми байналмилалии «Фалак» ба поён мерасад ва ғолибони он бо диплому туҳфаҳои қимматбаҳо қадр мешаванд.