Форуми байналмилалии иқтисодӣ

Душанбе, 10 октябр. (АМИТ «Ховар», Бекназари Абубакр). – Маъмурияти Минтақаи озоди иқтисодии «Суғд» якҷоя бо Вазорати рушди иқтисод ва савдои Ҷумҳурии Тоҷикистон ва мақомоти иҷроияи ҳокимияти давлатии вилояти Суғд 11 ва 12 октябри соли равон дар шаҳри Хуҷанд форуми дуюми байналмилалии иқтисодии «Нерӯи сармоягузории вилояти Суғд» — ро роҳандозӣ мекунад. Назар ба хабари сомонаи Минтақаи озоди иқтисодии «Суғд», форум имконияти нодире барои барқарор намудани равобити бисёрҷониба бо аҳли тиҷорат ва доираҳои илмии кишварҳои мухталиф, шиносоӣ бо имкониятҳои Тоҷикистон ва вилояти Суғд, ҳамчунин муҳокимаи масоили ҳамкории минбаъда, ҷалби сармоя ва мубодилаи таҷриба маҳсуб меёбад. Дар кори форум намояндагони ниҳодҳои молиявӣ, созмонҳои байналмилалию ғайриҳукуматӣ, аҳли тиҷорати хориҷӣ ва кишвар, палатаҳои савдо ва саноати мамлакатҳои хориҷи дур ва наздик иштирок хоҳанд кард.