Мулоқот дар Сафорати Қазоқистон

Душанбе, 9 октябр. (АМИТ «Ховар», Людмила Дубинина). – Ба муносибати 20 – солагии ташаббуси Президенти Ҷумҳурии Қазоқистон Нурсултон Назарбоев дар бораи даъвати Машварат ҷиҳати ҳамкорӣ ва тадбирҳои боварӣ дар Осиё (МҲТБО) ва муаррифии китоби «Султони меҳнат» (ба забони тоҷикӣ) 8 октябр дар Сафорати Қазоқистон дар Тоҷикистон мулоқот бо намояндагони созмонҳои давлатию ҷамъиятӣ ва васоити ахбори омма баргузор гардид.Дар ҷараёни мулоқот сафири Ҷумҳурии Қазоқистон дар Тоҷикистон Оғибой Смагулов зикр намуд, ки Президенти Ҷумҳурии Қазоқистон Нурсултон Назарбоев бори нахуст 5 октябри соли 1992 дар иҷлосияи 47 – уми Маҷмаъи Умумии Созмони Милали Муттаҳид масъалаи даъвати машварат аз рӯи ҳамкорӣ ва боварӣ дар Осиёро ба миён гузошта буд. Ин ташаббусро бархе давлатҳои Осиё дастгирӣ намуданд. Хотирнишон месозем, ки 5 октябр Рӯзи расмии Машварат ҷиҳати ҳамкорӣ ва тадбирҳои боварӣ дар Осиё маҳсуб меёбад.