Сафари С. Девонаев ба Қирғизистон

Душанбе, 9 октябр. (АМИТ «Ховар», Сарвинози Руҳуллоҳ)- 10-уми октябри соли равон Сафиаллоҳ Девонаев, сардори Хадамоти муҳоҷирати назди Ҳукумати Тоҷикистон озими шаҳри Бишкек- пойтахти Қирғизистон мешавад. Мақсад аз сафари сардори Хадамоти муҳоҷирати кишвар иштирок дар ҷаласаи навбатии Шӯрои роҳбарони сохторҳои муҳоҷирати кишварҳои узви ИДМ ва Шӯрои сиёсати муҳоҷират дар назди Кумитаи муҳоҷирати АвруОсиё унвон мешавад.  Дар ин бора ба АМИТ «Ховар» сухангӯи Хадамоти муҳоҷират Абдуллоҳи Қодирӣ иттилоъ дод. Тибқи хабари манбаъ, дар ҷаласа, ки рӯзҳои 10 ва 12 октябр баргузор мегардад, вазъи муҳоҷиратии кишварҳои узви ИДМ, раванди татбиқи қарори Шӯрои сарони ҳукуматҳо, Шӯрои вазирони корҳои хориҷии кишварҳои ИДМ ва роҳбарони сохторҳои муҳоҷиратии кишварҳои узви ИДМ дар соҳаи муҳоҷират, ҳамчунин раванди татбиқи қарори Шӯрои байнидавлатии АвруОсиё баррасӣ хоҳад шуд.