Семинари кормандони китобхонаҳо

Душанбе, 23 октябр. (АМИТ «Ховар», Раъно Нусратуллоева).- Имрӯз дар Китобхонаи миллии Тоҷикистон бо ибтикори шуъбаҳои илмию тадқиқотӣ ва таъмиру тармими ҳуҷҷатҳои китобхона семинари ҷумҳуриявии кормандони китобхонаҳои Ҷумҳурии Тоҷикистон доир ба масъалаҳои таъмиру тармими фондҳои китобии китобхонаҳои Тоҷикистон баргузор гардид. Тавре ки котиби матбуотии китобхона Фотима Яъқубова ба хабарнигори АМИТ «Ховар» иттилоъ дод, семинарро директори Китобхонаи мил¬лии Тоҷикистон Носирҷон Салимов ифтитоҳ намуд. Ҳамчунин дар мавзуъҳои «Масъалаҳои ҳифзу нигаҳдории махзани китобхонаҳои Тоҷикистон дар шароити кунунӣ» — гузориши сардори шуъбаи илмӣ ва таҳқиқотии Китобхонаи миллии Тоҷикистон Ҷ. Раҷабов, «Аз таърихи таъмири сарчашмаҳои нодир» — гузориши муовини директори Китобхонаи ба номи Т. Асирии вилояти Суғд Б. Мирсаидов, «Нигаҳдории нусхаҳои хаттии китобхонаи миллии Тоҷикистон ва дигар китобхонаю марказҳои илмӣ» — гузориши номзади илмҳои филологӣ, сардори шуъбаи дастхатҳои Шарқ ва китобҳои нодири Китобхонаи миллии Тоҷикистон А. Юнусов, «Тармими дастхат- зарурати замон: мушкилот ва дурнамои он» – гузориши ходими илмии Пажуҳишгоҳи забон, адабиёт, шарқшиносӣ ва мероси хаттии ба номи Рӯдакии АИ ҶТ И.Мирзоев ва «Тарзи таъмиру тармими маҳсулоти чопии китобхонаҳои Тоҷикистон» — гузориши сардори шуъбаи таъмир ва тармими ҳуҷҷатҳои Китобхонаи миллии Тоҷикистон Т.Баротов шунида шуд.Дар семинар мутахассисони соҳаи китобдорӣ аз шаҳру ноҳияҳои ҷумҳурӣ ва инчунин кормандони китобхонаҳои вилоятӣ низ ширкат варзиданд.