Ҳамкории ПСС ва Ширкати CRATA

Душанбе, 16 ноябр. (АМИТ «Ховар», Ибодат Давлатова ). – 15 ноябр дар шаҳри Душанбе мулоқоти раиси Палатаи савдо ва саноати Ҷумҳурии Тоҷикистон Шариф Саид бо намояндагони ширкати ҳуқуқшиносии CRATA баргузор гардид. Тавре аз Палатаи савдо ва саноати ҶТ ба АМИТ «Ховар» хабар доданд, ширкати мазкур аз ҷумлаи ширкатҳои асосии ҳуқуқшиносии ҷаҳонӣ дар Осиёи Марказӣ ва минтақаи баҳри Хазар маҳсуб ёфта, дар Осиёи Марказӣ, Британияи Кабир ва Русия дафтарҳои корӣ дорад. Ин ширкат хидмати ҳуқуқии сармоягузорони хориҷиеро анҷом медиҳад, ки ба бозорҳои кишварҳо, аз ҷумла ба бозори Тоҷикистон роҳ пайдо мекунанд. Мақсад аз мулоқот роҳандозии ҳамкории байни Палатаи савдо ва саноат ва ширкати CRATA барои барқарор намудани равобит бо сармоягузорон буд.Дар ҷараёни мулоқот масоили узвият ба Палатаи савдо ва саноат, фаъолияти Суди ҳакамии назди Палатаи савдо ва саноат, масъалаҳои тағйирот ба қонунгузории Ҷумҳурии Тоҷикистон ба манзури ҷалби сармояҳои хориҷӣ мавриди муҳокима қарор гирифтанд.