Ҷаласаи Шӯрои вазирони корҳои хориҷӣ

Душанбе, 16 ноябр. (АМИТ «Ховар»). – 15 ноябр дар пойтахти Ҷумҳурии Ҷибути шаҳри Ҷибути ҷаласаи 39 – уми Шӯрои вазирони корҳои хориҷии кишварҳои аъзои Созмони ҳамкории исломӣ оғоз ёфт.Дар ҷаласа вазири корҳои хориҷии Қазоқистон дар бораи кори иҷрошуда ба ҳайси раёсати Қазоқистон дар Шӯрои вазирони корҳои хориҷии созмони мазкур ҳисобот дод. Президенти Ҷумҳурии Ҷибути Исмоил Умар Гелле дар бораи масоили мубрами ҷаҳони исломӣ сухан ронда, саъю кӯшишҳои созмонро ҷиҳати ҳалли онҳо ба дараҷаи баланд арзёбӣ намуд. Ҷаласаи имсола таҳти шиори «Мушорикат ба хотири рушди устувор» сурат мегирад. Дар ҷараёни ҷаласа масоили муҳимтарини бахшҳои сиёсат, иқтисодиёт, фарҳанг ва илму техника мавриди баррасӣ қарор мегиранд.Дар кори ҷаласа намояндагони 57 давлати аъзои Шӯро кишварҳои мушоҳид ва созмонҳои ҷаҳонӣ, аз ҷумла ҳайати Ҷумҳурии Тоҷикистон бо роҳбарии муовини вазири корҳои хориҷии ҷумҳурӣ Низомиддин Зоҳидов ширкат доранд.Дар ин бора аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд.