Иҷлосияе, ки истиқлолияти Тоҷикистонро эҳё намуд

Хоруғ, 17 ноябр. (АМИТ «Ховар», Л.Додо ). – Дар мақомоти маҳаллии ҳокимияти давлатии ВМКБ бахшида ба 20 – умин солгарди Иҷлосияи Шӯрои Олии ҷумҳурӣ маҷлиси тантанавӣ баргузор гардид. Дар маърӯзаи раиси ВМКБ Қодири Қосим аз беҳокимиятиву бесарусомониҳои соли 1992, таҳдид ва адами истиқлолияти давлатии ҷумҳурӣ ва ба хотири рафъи даҳшати бар сари миллат омада баргузории Иҷлосияи 16 – уми тақдирсози миллати тоҷик сухан рафт. Зикр шуд, ки дар ин давра дар вилоят 140 мактаби замонавӣ бунёд гардид. Бо маблағи беш аз 1 миллиард сомонӣ 950 иншооти аҳамияти иқтисодию иҷтимоӣ дошта сохта шуд. Тибқи «Барномаи рушди иқтисодию иҷтимоии вилоят дар давраи то соли 2015» татбиқи корҳо оид ба тармиму таҷдиди корхонаҳои саноати коркарди сангҳои қимматбаҳо ва ороишӣ, саноати сабук ва маҳаллӣ, масолеҳи сохтмонӣ пешбинӣ гардидаанд.