Китоби сол-2012

Душанбе, 16 ноябр. (АМИТ «Ховар», Заррина Саидова).- Вазорати фарҳанги Тоҷикистон аз 20 ноябр то 20 декабри соли равон озмуни ҷумҳуриявии «Китоби сол-2012»- ро эълон менамояд.  Дар озмун ҳамаи муаллифони асарҳои назму насри тоҷик, ки китобҳояшон дар соли 2012 дар муассисаҳои нашриявииТоҷикистон нашр шудаанд, ҳуқуқи иштирок карданро доранд. Маҳорати маъниофарӣ, риояи санъати сухан, бадеият, забон, услуб, пайвастагии афкор ва банду басти силсилаи воқеаҳо, мувофиқати мазмуну мундариҷаи асар бо талаботи замони муосир шартҳои асосии озмун маҳсуб меёбанд.Барои ғолибон дипломҳо ва мукофоти зерини Вазорати фарҳанги Тоҷикистон, аз ҷумла барои ду китоби назм: дипломи дараҷаи аввал ва 1500 сомонӣ ва дипломи дараҷаи дуввум ва 1000 сомонӣ, барои ду китоби наср: дипломи дараҷаи аввал ва 1500 сомонӣ ва дипломи дараҷаи дуввум ва 1000 сомонӣ пешбинӣ шудааст.