Мактаб номи Ширин Бунёдро гирифт

Хоруғ, 16 ноябр. (АМИТ «Ховар», Л. Додо).- 13-уми ноябр дар мактаби миёнаи рақами 9-и деҳаи Хидорҷеви ноҳияи Роштқалъа ҷамъомади номгузории мактаби номбурда бо номи Шоири халқии Тоҷикистон Ширин Бунёд баргузор гардид. Дар он муовини раиси Маҷлиси Олии Маҷлиси миллии Ҷумҳурӣ, раиси ВМКБ Қодири Қосим зикр намуд, ки Ширин Бунёд чун қаламкаши тавонои ваҳдатсаро дар адабиёти тоҷик мавқеи муайяни худро дорад. Котиби бахши бадахшонии Иттиҳодияи нависандагон Лаълҷубаи Мирзоҳасан аз эҷодиёти шоир сухан ронд. Ҳунарпешагони Қасри фарҳанги ноҳия бо барномаи консертӣ баромад намуданд. Дар барнома сурудҳое садо доданд, ки матни онҳо ба қалами Ширин Бунёд таалуқ дошт. Дар ин рӯз инчунин осорхонаи шоир кушода шуд.