Нуфуси Роғун афзудааст

Душанбе, 16 ноябр.(АМИТ «Ховар», Марзия Саидова).-«Шумораи аҳолии шаҳри Роғун аз ҳама бештар бо суръати баланд афзуда, дар фосилаи байни барўйхатгириҳо 1, 7 баробар зиёд шудааст, ки ин ҳолат ба кўчида омадани аҳолӣ ба ин шаҳр иртибот дорад»,- чунин омадааст дар гузориши Агентии омори назди Президенти ҷумҳурӣ оид ба «Ҷамъбасти натиҷаҳои асосии барўйхатгирии аҳолӣ ва фонди манзил дар соли 2010». Дар гузориш гуфта шудааст, ки шаҳри бузургтарини ҷумҳурӣ Душанбе аст, ки шумораи аҳолиаш нисбат ба соли 2000-ум 162,9 ҳазор нафар ё 29% афзуда, 724,8 ҳазор нафарро ташкил медиҳад. Шаҳри соҳили Сир –Хуҷанд дуюмин шаҳри бузурги Тоҷикистон маҳсуб ёфта, нуфуси он нисбат ба соли 2000-ум 15,7 ҳазор ё 11 % афзуда, 162, 8 ҳазор нафар аст. Ду шаҳри ҷануби кишвар- Кўлобу Қўрғонтеппа ва як шаҳр дар шимоли Тоҷикистон –Истаравшан дар гуруҳи шаҳрҳои аҳолиашон аз 50 то 100 ҳазор раддабандӣ шудааст.