Вуруди 33 миллион доллар тавассути Қулма

Душанбе, 26 ноябр. (АМИТ «Ховар», Фирӯза Давлатова). – Додугирифти молу маҳсулот тавассути гузаргоҳи Қулма ба 33 миллион доллар расидааст.  Ҳарчанд, ки ҳаво сард шудааст, вале воридоти мол аз Чин ба Тоҷикистон тавассути ин гузаргоҳ коҳиш наёфтааст ва то боришоти барф ва басташавии ағбаҳои душворгузар гузаргоҳи Қулма фаъолият мекунад.Тавре ки иттилоъ доданд, дар давоми соли ҷорӣ бештар аз 3,5 ҳазор мошинҳои сабукрав ва борбар гузаргоҳи марзии байни Тоҷикистону Чинро убур карда, дар қиёс ба соли гузашта ба маблағи як миллион доллар моли зиёдтар ворид кардаанд. Ҳамчунин барои соҳибкорон имконият дода шудааст, ки дар кадом минтақае, ки хоҳанд, дар нуқтаҳои гумрукӣ борашонро ба расмият дароранд. Аз ҷумла, 30 дарсади моли воридотӣ дар нуқтаҳои гумруки ВМКБ ба расмияти гумрукӣ дароварда шудааст.