Нашри китоби нави Соҳиб Табаров

Душанбе, 28 январ. (АМИТ «Ховар», Баҳманёр Муродов).- Нашриёти «Дониш» китоби нави адабиётшиноси маъруфи тоҷик Соҳиб Табаровро бо номи «Пайрав Сулаймонӣ. Очерки ҳаёт ва эҷодиёт» ба нашр расонид. Дар ин китоб зиндагиномаи Пайрав оварда шуда, ҳамчунин осори ӯ нақду баррасӣ шудааст. Соҳиб Табаров аз ҷумлаи олимони пуркори тоҷик буда, солиёни зиёдест, ки дар соҳаи илму адаб фаъолияти густарда дорад. Ӯ атрофи зиндагиву эҷоди Мунзим, Фитрат ва дигар шоирони тоҷик тадқиқоти илмӣ бурдааст. Узви вобастаи Академияи илмҳои Тоҷикистон Соҳиб Табаров ҳанӯз соли 1962 китоберо перомуни ҳаёту осори Пайрав Сулаймонӣ нашр намуда буд ва китоби нави ӯ идомаи мантиқии китоби пешин буда, бо таҳриру иловаҳои тоза рӯйи чоп омадааст.