Артиши миллӣ- сипари боэътимоди кишвар

Душанбе, 21 феврал. (АМИТ «Ховар», Раъно Нусратуллоева).- Бахшида ба 20- солагии таъсиси Артиши миллии Ҷумҳурии Тоҷикистон имрӯз дар Консерваторияи миллии Тоҷикистон ба номи Талабхӯҷа Сатторов вохӯрии сардори шуъбаи кор бо ҷавонони Раёсати кор бо ҳайати шахсии Вазорати мудофиаи Ҷумҳурии Тоҷикистон полковник Хусрав Аминов баргузор гардид. Ҷамъомадро ректори консерватория Раҷабмад Амиров ифтитоҳ намуд. Дар вохӯрӣ полковник Аминов аз дастовардҳои Артиши миллӣ дар замони истиқлолият сухан гуфта, зикр намуд, ки Артиши миллии Ҷумҳурии Тоҷикистон ҳамчун сипари боэътимод метавонад барои осоиштагии мардуми кишвар хизмат намояд. Бояд гуфт, ки сол то сол сафи афсарони касбӣ дар Қувваҳои мусаллаҳ меафзояд,ки ин боиси боло рафтани иқтидори мудофиавии кишвар мегардад. Воқеаҳои солҳои охир нишон доданд, ки Артиши миллӣ метавонад бар зидди ҳама гуна нобасомониҳо, аз ҷумла терроризму экстремизми сиёсӣ истодагарӣ карда, муборизаи беамон барад.  Дар фарҷоми вохӯрӣ аз ҷониби омӯзгорон ва муҳассилини консерватория бахшида ба ҷашни Артиши миллӣ шеъру таронаҳои ватандӯстона иҷро шуданд.