Чор лоиҳаи қонуни нав дар парлумон баррасӣ гардид

Душанбе, 18 феврал.(АМИТ «Ховар», Марзия Саидова).- Чор лоиҳаи нави қонунҳои Ҷумҳурии Тоҷикистон — «Дар бораи гаравхона (ломбард)», «Дар бораи кооперативҳо», «Дар бораи барўйхатгирии аҳолӣ» ва «Дар бораи сири давлатӣ» дар ҷаласаи Шӯрои Маҷлиси намояндагони Маҷлиси Олии ҷумҳурӣ, ки 18 феврал таҳти раёсати Шукурҷон Зуҳуров –раиси палатаи поёнии парлумони мамлакат доир гардид, баррасӣ шуд.Аъзои Шўрои Маҷлиси намояндагон ҳамзамон ворид намудани тағйиру иловаҳо ба як қатор қонунҳои амалкунанда, бахусус лоиҳаи қонунҳои Ҷумҳурии Тоҷикистон «Дар бораи ипотека», «Кодекси граждании Ҷумҳурии Тоҷикистон (қисми якум)», «Мубориза бар зидди терроризм», «Дар бораи муқовимат ба қонунигардонии (расмикунонии) даромадҳои бо роҳи ҷиноят бадастоварда ва маблағгузории терроризм» ва «Кодекси ҷиноятии Ҷумҳурии Тоҷикистон»-ро баррасӣ намуданд. Раисони кумитаҳои Маҷлиси намояндагон Сафаралӣ Раҷабов, Маҳмадалӣ Ватанов ва дигар аъзои Шӯро ҷиҳати такмили лоиҳаҳои қонунҳои баррасишуда андешаҳояшонро баён доштанд. Дар фарҷом қисме аз масъалаҳои баррасишуда барои муҳокима ва такмил ба кумитаҳои Маҷлиси намояндагон ва қисми дигар ҷиҳати баррасӣ ба ҷаласаи навбатии иҷлосияи чоруми палатаи поёнии парлумони мамлакат ироа гардиданд.