Қуръапартоӣ барои сафари ҳаҷ шаффоф буд?

Душанбе, 10 апрел. (АМИТ «Ховар»).- Имрӯз дар толори «Филармонияи давлатии Тоҷикистон» барои ба даст овардани роҳхати «Ҳаҷ- 2013» барои сокинони ноҳияи Синои пойтахт қуръапартоӣ баргузор шуд. Тибқи мушоҳидаи хабарнигорони АМИТ«Ховар» қуръапартоӣ дар ҳузури раиси ноҳия Зафар Сафаров, масъулини Кумитаи корҳои дини назди Ҳукумати Ҷумҳурии Тоҷикистон, аъзои комиссия ва инчунин чандин нафар масъулони сохторҳои марбутаи кишвар ба таври шаффоф баргузор шуд. Ба рӯйхати ҳаҷравандагони имсолаи ин ноҳия нафарони 70-80 сола, ҳаҷравандагоне, ки солҳои пеш номашонро дар навбат гузоштаанд, бе навбат шомил шуданд (143 нафар), боқимонда 488 нафаре, ки номнавис шудаанд, барои 57 роҳхат қуръакашӣ намуданд. Зафар Сафаров, ки пешбарандаи ин ҷаласа буд, корро тарзе пеш бурд, ки нигароние вуҷуд надошт ва бо чанд нафаре, ки ҳамсуҳбат шудем, аз риоя шудани адолат ҳимоят мекарданд. Тибқи иттилои масъулини Кумитаи корҳои дини назди Ҳукумати кишвар, 2-сол мешавад, ки роҳбарияти ин ноҳия ҳаҷравандагонро ба таври қуръапартоӣ интихоб мекунанд, то тақаллубе дар миён набошад, ки ба гуфтаи вай ин яке аз ҳадафҳои Ҳукумати кишвар маҳсуб мешавад.  Ёдрас мекунем, ки имсол тибқи ҳисоботи раиси ноҳияи Сино 823 нафар сокини ин ноҳия барои сафари ҳаҷ хучат супорида ва танҳо 488 нафар асноди дуруст пешниҳод кардаанд.