Иштироки Сарвари давлат дар кушоиши маҷмааи варзишии ВКД

Душанбе, 23 апрел. (АМИТ «Ховар»).- Имрӯз Президенти Ҷумҳурии Тоҷикистон муҳтарам Эмомалӣ Раҳмон ба Вазорати корҳои дохилӣ ташриф оварда, дар расми кушоиши маҷмааи варзишӣ иборат аз толорҳои гуштингирӣ, вазнбардорӣ, бозии футболи хурд, волейбол, баскетбол, фитнес ва ҳавзи шиноварӣ, ки мутобиқи меъёрҳои байналмилалӣ таҷҳиз шудаанд, иштирок намуд.Сарвари давлат Эмомалӣ Раҳмон нахуст бо варзишгарони Шӯрои ҷумҳуриявии «Динамо»-и Вазорати корҳои дохилӣ мулоқот доир намуда, ба онҳо барору комёбӣ ва дастовардҳои варзишӣ таманно намуд. Сарвари давлат ба варзишгарон муроҷиат намуда, изҳор кард, ки: «Шумо дар кадом мусобиқа ва дар куҷое, ки набошед, Роҳбари давлат ва 8 миллион аҳолии Ҷумҳурии Тоҷикистон бо Шумост!»Сипас, Президенти Ҷумҳурии Тоҷикистон муҳтарам Эмомалӣ Раҳмон ба толори гӯштингирӣ ва вазнбардорӣ ворид шуда, аз таҷҳизоти варзишӣ ва тарзи истифодаи онҳо дидан намуд.Роҳбари давлат ба толори бузурги бозии футболи хурд, волейбол, баскетбол ва фитнес ворид шуда, бо варзишгарони ҷабҳаҳои гуногуни варзишӣ ва насли ҷавону наврас мулоқот доир намуда, аз таъсиси чунин як толори барҳавою замонавӣ изҳори қаноатмандӣ намуд. Дар мулоқот Ҷаноби Олӣ изҳор кард, ки «Варзиш ин солимии миллат аст. Ман боварӣ дорам, ки Шумо шуҳрати варзишии моро боло мебардоред ва ба дастовардҳои назаррас ноил мегардед».Мавсуф махсусан ба намуди варзишии волейбол ва баскетбол таваҷҷуҳ зоҳир намуда, зикр кард, ки «Волейбол ва баскетбол яке аз намудҳои беҳтарини варзишанд» ва тамоми варзишгарон саф ороста, бо Ҷаноби Олӣ расми хотиравӣ гирифтанд.Ҳамчунин Сарвари давлат аз толори ҳавзи шиноварӣ дидан намуда, ба тарзи сохтмон ва ороиши он баҳои баланд дод.Дар хотима Президенти Ҷумҳурии Тоҷикистон Эмомалӣ Раҳмон дар саҳни ҳавлии вазорат бо ҳайати шахсӣ суҳбати пурмуҳтаво доир намуда, онҳоро ба машғул шудан ба варзиш ва тозагию ободкорӣ ҳидоят намуд. Роҳбари давлат зимни суханронӣ изҳор кард, ки «Маҷмааи варзишии Вазорати корҳои дохилӣ дар сатҳи баланд ва бо меъёрҳои замонавӣ мутобиқ сохта шудааст. Шумо кормандони мақомоти корҳои дохилӣ, ки шабонарӯзӣ дар ҳифзи тартиботи ҷамъиятӣ қарор доред, бояд пайваста ба варзиш машғул шавед ва руҳану ҷисман пурқувват ва солим бошед».